Дар донишкада бахшида ба Рӯзи Мавлоно Ҷалолиддини Балхӣ конфронси илмӣ-адабӣ таҳти унвони “Зиндагӣ бо ёду зикри ту накӯст...” баргузор гардид.

Нахуст видеоролик бахшида ба ҳаёт ва эҷодиёти Мавлоно Ҷалолиддин Балхӣ намоиш додла шуд. Аз тарафи донишҷӯён аз ашъори пурғановати шоир ғазалҳо қироат карда шуданд.

Сипас директори Маркази илмии “Камоли Хуҷандӣ” Баҳроми Раҳматзод дар мавзуъи “Нигоҳе ба Маснавии Маънавӣ” ва мудири бахши адабиёт ва камолшиносии Маркази илмии “Камоли Хуҷандӣ” Исмоил Саидов таҳти унвони “Мавлоно кист? Ва чиро меомӯзад” маърӯзаҳои илмӣ намуданд.

Таъкид шуд, ки Мавлоно Ҷалолиддини Балхӣ яке аз чеҳраҳои намоёни тамаддуни башар буда, осори ӯ, махсусан, “Маснавии маънавӣ” ва “Девони Шамс” то ба имрӯз барои бисёре аз инсонҳо дар саросари ҷаҳон манбаи илҳом гардидаанд. Ибрози андеша карда шуд, ки 30 сентябр Рӯзи бузургдошти Мавлоно дар тамоми ҷаҳон аст ва бори аввал бо қарори Юнеско дар соли 2007 таҷлил гардидааст.

Осори гаронбаҳои Мавлоно Ҷалолиддини Балхӣ пурарзиштарин мероси ҳама давру замонҳо аст. Шоир ва адабиётшиноси амрикоӣ Колман Баркс тарҷумаи пораҳои шеърии Мавлоноро аз «Маснавӣ» ва «Девони кабир» дар 13 маҷмуаи хурду бузург ба табъ расонд. Ба иттилои муҳаққиқони амрикоӣ, тарҷумаҳои Колман Баркс ашъори Мавлоноро ба пурхонандатарин китоб дар Иёлоти Муттаҳидаи Амрико табдил додаанд.

Маърӯзачиён нақши Мавлоно Ҷалолиддини Балхиро дар эҷод ва ташаккули адабиёти классикӣ барҷаста арзёбӣ намуданд. Зикр карданд, ки Истиқлоли давлатӣ имконият фароҳам овард, ки миллати куҳантамаддуни тоҷик ба омӯзиши осори баландарзиши ниёгон аз дидгоҳи нав рӯ орад ва онро мувофиқ ба ормонҳои деринаи миллат таҳқиқ намояд. Ҳамзамон ба наслҳои имрӯза, ки меросбарони ояндаи давлату миллат ва тамаддуни беш аз шашунимҳазорсолаи миллати тоҷик мебошанд, таълим диҳад ва онҳоро дар руҳияи ифтихор аз ҳувияти миллӣ ва гиромӣ доштани таъриху тамаддуни ниёгон раҳнамун созад.

Ҷоиз ба зикр аст, ки чунин чорабиниҳои илмию адабию фарҳангӣ ва илмию маърифатӣ, бешак, ба тарғибу ташвиқи осори Мавлоно ва тарбияи насли наврас дар руҳияи эҳтирому арҷгузорӣ ба мероси ниёгон, таҳкими ҳофизаи таърихӣ ва ташаккули ҳувияти миллӣ мусоидат мекунанд.

Шуъбаи кор бо ВАО