Дар доираи нақшаи чорабиниҳо доир ба татбиқи солҳои рушди иқтисоди рақамӣ ва инноватсия (2025 - 2030) дар донишкада бо иштироки роҳбарият, ҳайати кормандон ва донишҷӯён дар мавзуи “Низоми ягонаи гардиши ҳуҷҷатҳои электронӣ” омӯзиш баргузор гардид.

Зимни омӯзиш кормандони Агентии инноватсия ва технологияҳои рақамии назди Президенти Ҷумҳурии Тоҷикистон роҷеъ ба мавзуи мазкур ба таври ҳаматарафа, возеҳу равшан баромад намуда, мазмуну мундариҷаи қарори Ҳукумати Ҷумҳурии Тоҷикистон аз 23 июни соли 2025, №355 “Дар бораи Дастурамали намунавии коргузорӣ дар мақомоти давлатӣ, корхона, муассиса ва ташкилотҳои дигари давлатии Ҷумҳурии Тоҷикистон”-ро ба самъи иштирокдорон расониданд.

Аз ҷумла дарҷ гардид, ки гузариш ба гардиши ҳуҷҷатҳои электронӣ на танҳо як тамоюли муосир, балки зарурати муносибгардонии фаъолият, баланд бардоштани шаффофият, беҳтар кардани сифати хизматрасонӣ ба шаҳрвандон ва кам кардани хароҷот мебошад. Инчунин, ин гузариш барои беҳтар кардани идоракунӣ ва рушди иқтисодӣ имкониятҳои нав фароҳам меоварад.

Дар охир миёни кормандон ва донишҷӯён бо намояндаи Агентӣ саволу ҷавоб ва андешарониҳо оид ба муҳиммият ва аҳаммияти гузаштани коргузорӣ ба низоми ягонаи гардиши ҳуҷҷатҳои электронӣ доир гардид.

Шуъбаи иттилоот кор бо ВАО