Дар таърихи давлатдории навини тоҷикон шахсиятҳое ҳастанд, ки бо хирад, шуҷоат ва садоқати худ сарнавишти миллатро тағйир додаанд. Дар ҳамин замина, Рӯзи Президенти Ҷумҳурии Тоҷикистон, ки ҳамасола 16 ноябр таҷлил карда мешавад, яке аз санаҳои муҳим ва ифтихорманди миллӣ ба ҳисоб меравад. Ин рӯз ба номи шахсият ва мақоме вобаста аст, ки барои истиқлолият, ваҳдати миллӣ ва рушду пешрафти давлати тоҷикон нақши таърихӣ гузоштааст.

Таърихи таъсиси Рӯзи Президент

Рӯзи Президенти Ҷумҳурии Тоҷикистон бо Қонуни Ҷумҳурии Тоҷикистон аз 14 апрели соли 2016 расман таъсис ёфта, 16 ноябр ҳамчун ҷашни давлатӣ эълон гардид. Ин сана ба рӯйдоди муҳими таърихӣ — Иҷлосияи XVI Шӯрои Олии Ҷумҳурии Тоҷикистон (соли 1992, шаҳри Хуҷанд) мувофиқ аст. Маҳз дар ҳамин иҷлосия муҳтарам Эмомалӣ Раҳмон Раиси Шӯрои Олӣ интихоб гардиданд ва роҳбарии давлатро дар давраи бисёр душвор — солҳои ҷанги шаҳрвандӣ ба зимма гирифтанд.

Ин рӯйдод оғози давраи нави давлатсозӣ, сулҳоварӣ ва эҳёи миллати тоҷик буд. Аз ҳамин сабаб, Рӯзи Президент рамзи наҷоти миллӣ, сулҳу субот ва оғози давлати соҳибистиқлол дониста мешавад.

Нақши институт ва шахсияти Президент дар таҳкими давлатдорӣ

Мақоми Президент дар Ҷумҳурии Тоҷикистон аз рӯйи Конститутсия сардори давлат, рамзи ваҳдати миллӣ ва кафили Конститутсия ва ҳуқуқу озодиҳои шаҳрвандон мебошад.

Дар шахсияти Президенти Ҷумҳурии Тоҷикистон муҳтарам Эмомалӣ Раҳмон сифату хислатҳое таҷассум ёфтаанд, ки барои роҳбарии хирадмандона ва муваффақи давлат заруранд — ваҳдатофаринӣ, масъулиятшиносӣ, адолатпешагӣ ва муҳаббат ба Ватан.

Сиёсати хирадмандонаи Пешвои миллат имкон дод, ки Тоҷикистон пас аз ҷанги шаҳрвандӣ ба сулҳ расад, истиқлолияти худро таҳким бахшад ва ба давлати ҳуқуқбунёд, демократӣ ва дунявӣ табдил ёбад.

Рӯзи Президент — рамзи ифтихор ва ваҳдати миллӣ

Имрӯз Рӯзи Президент на танҳо ҷашни як шахс, балки ҷашни ваҳдату давлатдорӣ аст. Дар ин рӯз шаҳрвандони кишвар на танҳо ба шахсияти Асосгузори сулҳу ваҳдати миллӣ арҷ мегузоранд, балки ба тамоми дастовардҳои даврони истиқлол эҳтиром зоҳир менамоянд.

Дар мактабҳо, донишгоҳҳо ва муассисаҳои давлатӣ чорабиниҳои илмию маърифатӣ баргузор мегарданд, ки ҳадафашон шиносонидани насли ҷавон бо таърихи давлатсозӣ ва нақши Президент дар таҳкими Ватан мебошад.

Мунзифа Раҳимова, устоди ДПДТТХ