Устоди муҳтарам Саъдуллозода Шаҳриёр Саъдулло!

Шуморо бо муносибати таъин шуданатон ба вазифаи ректори Муассисаи давлатии таълимии «Донишгоҳи инноватсия ва технологияҳои рақамии Тоҷикистон» самимона табрику муборакбод мегӯем.

Имрӯзҳо мо аз он сарфарозем, ки таҳти роҳбарии Шумо Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд дар як муддати кӯтоҳ ба дастовардҳои назаррас соҳиб гардид.

Баланд шудани сифати таълиму тарбия, муаррифии шоистаи донишкада дар дохил ва хориҷи кишвар, афзун шудани шумораи донишҷӯён, таҳкими пойгоҳи моддии донишкада, ҳимояи рисолаҳои номзадию докторӣ, ғолибияти донишҷӯёну устодон дар озмунҳои ҷумҳуриявию байналмилалӣ, эътироф ва ҳамкориҳои судманди муассисаҳои олии минтақавӣ ва байналхалқӣ аз заҳмату талош ва натиҷаи кӯшишҳои пайвастаи Шумо ҳамчун сарвари донишкада ба даст омадааст.

Сарчашмаи ҳамаи ин дастовардҳо, аз фазилати неки инсонӣ, эҳсоси масъулият, саъю комил, меҳнатқаринӣ, хоксорӣ ва донишмандию ташкилотчигии Шумо гувоҳӣ медиҳад, ки ҷомеаи меҳнатиро сарҷамъ ва мақому эътибори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷандро бори дигар баланд бардоштед.

Мутмаъинем, ки Шумо чун инсони ҳалиму хушгуфтор, олими соҳибназару донишманд, шахсияти ташаббускору қавиирода, фарди ватандӯсту меҳанпараст ва роҳбари кордону дурандеш дар пеш бурдани фаъолияти таълимию илмӣ ва тарбиявии Муассисаи давлатии таълимии «Донишгоҳи инноватсия ва технологияҳои рақамии Тоҷикистон» ва амалӣ намудани ғояҳои ҷадид ҷаҳду талоши тоза меварзед.

Бароятон дар иҷрои ин рисолати азим бурдборӣ ва муваффақияту комёбиҳои навро орзумандем!

Устодон ва донишҷӯёни Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд