Дар озмуни “Ихтироъкорон ва навоварони ҷавони вилояти Суғд”, ки дирӯз санаи 17.12.2025 натиҷагирӣ карда шуд, аз Донишкадаи политехникии Донишгоҳи техникии Тоҷикистон ба номи академик М.С.Осимӣ 4 нафар донишҷӯён аз рӯйи номинатсияҳо ширкат варзида ихтироот ва истеъдодҳои худро ба аъзои ҳакамон пешкаш намуданд, ки дар натиҷа ду нафар донишҷӯёни донишкада: Тошхоҷа Олимов, бо лоиҳаи “Таҷҳизот мастер элак (DIY)” таҳти роҳбарии н.и.т. Назира Бобоҷонова баромад намуда, ҷойи якумро аз рӯйи номинатсияи “Ихтирокорӣ ва навоварӣ” даст овард. Донишҷӯи дигари донишкада Далер Мӯъминов бо лоиҳаи “Тюнинги системаи баромади газҳои сӯхташуда бо сохтани садохомӯшкунаки конструксияи навдошта” таҳти роҳбарии н.и.т. Мазбут Холиқзода баромад намуда сазовори ҷойи 3-юм аз рӯйи номинатсияи “Ихтирокорӣ ва навоварӣ”гашт.

Дар маросими қадршиносии ғолибони озмуни “Ихтироъкорон ва навоварони ҷавони вилояти Суғд”, ки Раиси вилояти Суғд Раҷаб Аҳмадзода аз Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилию хориҷии ҷумҳурӣ» ёдовар шуд.

Таъкид гардид, ки Пешвои миллат муҳтарам Эмомалӣ Раҳмон соҳаи илму маорифро дар маркази таваҷҷуҳ қарор дода, барои рушди соҳа, ташаккули тафаккури техникӣ, омӯзиши илмҳои замони муосир, рӯ овардан ба ихтироъкорӣ ва навоварӣ, истифодаи илм дар истеҳсолот дастуру супоришҳои мушаххас доданд.

Дар вилояти Суғд баҳри амалӣ намудани нуктаҳои Паёми Пешвои миллат ба Маҷлиси Олӣ тадбирҳои судманд андешида шуда, дар самти ҷалби таваҷҷуҳи ҷавонону наврасон ба омӯзиши илм, соҳибкасб гардидани онҳо ва ҳавасманд намудани ихтироъкорону навоварон аз зарфиятҳои мавҷуда мақсаднок истифода мешавад.

Раиси вилоят иброз дошт, ки имрӯз дар баробари рушди бесобиқаи илму техника, истифодаи васеи технологияҳои пешқадам, татбиқи усулҳои инноватсионии таълим, ташаккули робитаи мустаҳками илму истеҳсолот, ҳамчунин баланд бардоштани сатҳу сифати таълиму тарбияи ҷавонони бомаърифат ва донишманду навовар аз вазифаҳои муҳим ва ҳадафҳои стратегии давлату Ҳукумати мамлакат маҳсуб меёбад.

Роҳбарони муассисаҳои олӣ ва миёнаи касбӣ, масъулини соҳаи маориф вазифадор карда шуданд, ки дар самти ҳавасманд намудани ҷавонони пешсаф, баланд бардоштани сатҳу сифати таълиму тарбия, рушди тафаккури техникӣ ва тарғиби дастовардҳои ҷавонони навовар тадбирҳои судмандро амалӣ намоянд.

Сипас, аз ҷониби Раиси вилоят Раҷаб Аҳмадзода дар фазои тантанавӣ ба ғолибони озмуни вилоятии “Ихтироъкорон ва навоварони ҷавони вилояти Суғд” диплом ва туҳфаҳои пулӣ супорида шуд.

Шуъбаи иттилоот ва кор бо ВАО